അതിരൂപതാ ബൈബിൾ കൺവെൻഷന്റെ നാലാം ദിവസമായ ഫെബ്രുവരി 17 ഉച്ചകഴിഞ്ഞ് 3.00 ന് ആരംഭിച്ച ജപമാലപ്രാർത്ഥനയ്ക്കും തുടർന്നുള്ള ദ്ബസ്ശാ ശായീൻ പ്രാർത്ഥനയ്ക്കുംശേഷം സെന്റ് മേരീസ് പാരിഷ് ഹാളിൽനിന്നും തുടങ്ങിയ പ്രാരംഭപ്രദക്ഷിണത്തോടെ ആഘോഷമായ പരിശുദ്ധ കുർബാനയാരംഭിച്ചു. സീറോമലബാർസഭ മേജർ ആർച്ചുബിഷപ് എമെരിത്തൂസ് കർദിനാൾ മാർ ജോർജ് ആലഞ്ചേരി പരിശുദ്ധ കുർബാനയ്ക്കു മുഖ്യകാർമികത്വം വഹിച്ചു. അതിരൂപതാ മെത്രാപ്പോലീത്ത അഭി. മാർ ജോസഫ് പെരുന്തോട്ടം, അപ്പസ്തോലിക് നുൺഷ്യോ എമെരിത്തൂസ് അഭി. മാർ ജോർജ് കോച്ചേരി, അതിരൂപതാ സഹായമെത്രാൻ അഭി. മാർ തോമസ് തറയിൽ, ഫൊറോനാ വികാരിമാർ, അതിരൂപതയിലെ ഇടവക – സമർപ്പിതവൈദികർ എന്നിവർ സഹകാർമികരായിരുന്നു. അതിരൂപതയിലെ സമർപ്പിതരും പാസ്റ്ററൽ കൗൺസിൽ – ഫൊറോനാ കൗൺസിൽ അംഗങ്ങളും സംഘടനകളുടെ അതിരൂപത – ഫൊറോനാ ഭാരവാഹികളും ഇടവകയിൽനിന്നുള്ള പ്രതിനിധികളും നിരവധി ദൈവജനവും അതിരൂപതാതല യൂക്കരിസ്റ്റിക് കോൺഗ്രസ് ദിനാചരണത്തിൽ പങ്കുചേർന്നു.