പാലക്കാട്: പാലക്കാട് രൂപതയുടെ സുവർണ്ണ ജൂബിലിയോട് അനുബന്ധിച്ച് രൂപതയിലെ സമർപ്പിതരുടെയും രൂപതയിൽ നിന്നുള്ള സമർപ്പിതരുടെയും സംഗമം സംഘടിപ്പിച്ചു. ഏപ്രിൽ ആറിന് രാവിലെ 10 മണിക്ക് കത്തീഡ്രൽ പാരിഷ് ഹാളിൽ മാർ ജേക്കബ് മനത്തോടത്ത് പിതാവ് സമർപ്പിത സംഗമം ഉദ്ഘാടനം ചെയ്തു. മാർ പീറ്റർ കൊച്ചുപുരയ്ക്കൽ സ്വാഗതം ആശംസിച്ചു. സി. ജോസിയ SD ആമുഖ പ്രഭാഷണം നടത്തി. രാവിലെ 11.45 ഓടെ എല്ലാവരും ഒന്ന് ചേർന്ന് വിശുദ്ധ കുർബാന അർപ്പിച്ചു.
ഉച്ചഭക്ഷണത്തിനുശേഷം നടന്ന പൊതുസമ്മേളനത്തിൽ പുൽപ്പള്ളി KVM UP സ്കൂളിലെ വിദ്യാർത്ഥികൾ രംഗപൂജ സമർപ്പിച്ചു. തുടർന്ന് രൂപതയുടെ ലഘു ചരിത്രം ഡോക്യുമെന്ററി ആയി അവതരിപ്പിച്ചു. ബഹുമാനപ്പെട്ട ആന്റണി പുത്തനങ്ങാടി CMI പൊതുസമ്മേളനത്തിലേക്ക് എല്ലാവരെയും സ്വാഗതം ചെയ്തു. മാർ പീറ്റർ കൊച്ചുപുരയ്ക്കൽ പിതാവ് പൊതുസമ്മേളനം ഉദ്ഘാടനം ചെയ്ത് സംസാരിക്കുകയും പൗരോഹിത്യ-സന്യാസ സമർപ്പണത്തിന്റെ ജൂബിലി ആഘോഷിക്കുന്നവരെ അനുമോദിക്കുകയും ചെയ്തു. ജൂബിലി വർഷത്തോട് അനുബന്ധിച്ച് ആരംഭിച്ച ഫെസിലിറ്റേഷൻ സെന്ററിന്റെ ലോഗോയുടെയും വെബ്സൈറ്റിന്റെയും ഉദ്ഘാടനവും മാർ പീറ്റർ കൊച്ചുപുരയ്ക്കൽ പിതാവ് നിർവഹിച്ചു.
