തിരുവമ്പാടി : കെസിബിസി അംഗീകരിച്ച വിധവകളുടെ സംഘടനയായ യൂദിത്ത് ഫോറത്തിന്റെ താമരശ്ശേരി രൂപതാ വാർഷിക സമ്മേളനവും നിയമാവലി പ്രകാശനവും ഏപ്രിൽ 6ന് തിരുവമ്പാടി ഫൊറോനാ ദേവാലയത്തിൽ വച്ച് താമരശ്ശേരി രൂപതാധ്യക്ഷൻ മാർ റെമീജിയോസ് ഇഞ്ചനാനിയിൽ നിർവഹിച്ചു. വിധവകൾ ദൈവത്തിന്റെ പ്രത്യേക ദൈവവിളി സ്വീകരിച്ചവരാണെന്നും ദൈവത്തിന് അവരെക്കുറിച്ച് പ്രത്യേക പ്ലാനും പദ്ധതികളും ഉണ്ടെന്നും അവർ സമൂഹത്തിന് വലിയ ജീവിത സാക്ഷ്യമാണ് നൽകുന്നതെന്നും മാർ ഇഞ്ചനാനിയിൽ ഉദ്ഘാടന പ്രസംഗത്തിൽ പറഞ്ഞു. തനിയെ മക്കളെ വളർത്തി വലുതാക്കി അനുയോജ്യമായ ജീവിതാന്തസിലേക്ക് അവരെ പ്രവേശിപ്പിക്കുന്നതുവഴി വലിയ സുവിശേഷ പ്രഘോഷണമാണ് വിധവകൾ നടത്തുന്നതെന്നും അദ്ദേഹം കൂട്ടിച്ചേർത്തു.
മീറ്റിങ്ങിന് മുന്നോടിയായി സിഎംസി പ്രൊവിൻഷ്യൽ റവ. സിസ്റ്റർ പവിത്ര റോസ് വിധവകളുടെ ജീവിതം വഴി ദൈവജനത്തിനും കുടുംബത്തിനും സഭയ്ക്കും നൽകാൻ കഴിയുന്ന ആധ്യാത്മികവും ഭൗതികമായ സേവനങ്ങളെ അധികരിച്ച് വിശദമായ ക്ലാസ് നൽകി. തുടർന്ന് നടന്ന യോഗത്തിൽ യൂദിത്ത് ഫോറം രൂപത ഡയറക്ടർ ഫാ. ജോസ് പെണ്ണാപറമ്പിൽ അധ്യക്ഷനായിരുന്നു. തിരുവമ്പാടി ഫൊറോന വികാരി ഫാ. തോമസ് നാഗപറമ്പിൽ മരിയാപുരം എപ്പിസ്കോപ്പൽ വികാരി ഫാ. ജെയിംസ് വാമറ്റത്തിൽ സിഎംസി താമരശ്ശേരി പ്രൊവിൻഷ്യൽ സിസ്റ്റർ പവിത്ര റോസ്, യൂദിത്ത് ഫോറം രൂപത ആനിമേറ്റർ സിസ്റ്റർ റെനി ജോസ് സിഎംസി, എസ്എച്ച് കോൺഗ്രിഗേഷൻ യൂദിത്ത് ഫോറം കോർഡിനേറ്റർ സിസ്റ്റർ വിമല എസ്എച്ച്, യൂദിത്ത് ഫോറം രൂപത പ്രസിഡന്റ് ശ്രീമതി മേരി പൗലോസ്, ശ്രീമതി ജോളി ജോസഫ് തുടങ്ങിയവർ പ്രസംഗിച്ചു. മരിയാപുരം എപ്പിസ്കോപ്പൽ ദേവാലയത്തിലെ യൂദിത്ത് ഫോറം അംഗങ്ങൾ കേരള കത്തോലിക്ക നസ്രാണികളുടെ പാരമ്പര്യ കലയായ വില്ലടിച്ചാൻ പാട്ട് മനോഹരമായി അവതരിപ്പിച്ചു. രൂപതയിലെ വിവിധ ഇടവകകളിൽ നിന്ന് വിവിധ സന്യാസിനി സമൂഹത്തിലെ സിസ്റ്റർമാരുടെ നേതൃത്വത്തിൽ 250 ഓളം വിധവകളും ഏകസ്ഥരുമായവർ സംഗമത്തിൽ പങ്കെടുത്തു.
