കുന്നമംഗലം: താമരശേരി രൂപതയുടെ വിദ്യാഭ്യാസ പരിശീലന കേന്ദ്രമായ കുന്നമംഗലത്തെ ആല്‍ഫ മരിയ അക്കാദമിയുടെ പുതിയ കെട്ടിടം താമരശേരി ബിഷപ്‌ മാര്‍ റെമീജിയോസ്‌ ഇഞ്ചനാനിയില്‍ നാടിനു സമര്‍പ്പിച്ചു. വിദ്യാര്‍ഥികള്‍ക്ക്‌ താമസിച്ച്‌ പഠിക്കുന്നതിനടക്കമുള്ള കൂടുതല്‍ സൗകര്യങ്ങളുള്ളതാണ്‌ പുതിയ കെട്ടിടം.
സിവില്‍ സര്‍വീസ്‌ ഫൗണ്ടേഷന്‍ കോഴ്‌സ്‌, ജര്‍മന്‍ ഭാഷാ പരിശീലനം, കോമണ്‍ എൻട്രൻസ് പരീക്ഷാ പരിശീലനം തുടങ്ങിയ കോഴ്സുകളിലായി ധാരാളം വിദ്യാര്‍ഥികള്‍ ഇവിടെ പരിശീലനം നേടുന്നുണ്ട്‌. മത്സര പരീക്ഷകള്‍ക്ക്‌ വിദ്യാര്‍ഥികളെ സജ്ജമാക്കുന്നതിനുള്ള വിദഗ്ധ പരിശീലന കേന്ദ്രമായ ആല്‍ഫ മരിയ അക്കാദമിക്ക്‌ പുതിയ കെട്ടിടം യാഥാര്‍ഥ്യമായത്‌ അഭിമാനകരമായ ചുവടുവയ്പാണെന്ന്‌ പൊതുസമ്മേളനത്തില്‍ പ്രസംഗിച്ചവര്‍ അഭിപ്രായപ്പെട്ടു.
പുതിയ കെട്ടിടത്തിന്റെ വെഞ്ചിരിപ്പും തുടര്‍ന്നു നടന്ന പൊതുസമ്മേളനവും ബിഷപ്‌ മാര്‍ റെമീജിയോസ്‌ ഇഞ്ചനാനിയില്‍ നിര്‍വഹിച്ചു. ആല്‍ഫ മരിയ അക്കാദമിയെ സംബന്ധിച്ചിടത്തോളം സ്വപ്ന സാക്ഷാത്കാരമാണ്‌ പുതിയ കെട്ടിടമെന്ന്‌ മാര്‍ റെമീജിയോസ്‌ ഇഞ്ചനാനിയില്‍ പറഞ്ഞു. ചടങ്ങില്‍ താമരശേരി രൂപത വികാരി ജനറാള്‍ മോണ്‍. ഏബ്രഹാം വയലില്‍ അധ്യക്ഷത വഹിച്ചു. പാറോപ്പടി സെന്റ് ആന്റണീസ്‌ ഫൊറോന പള്ളി വികാരി ഫാ. ജോസഫ്‌ കളരിക്കല്‍, കുന്നമംഗലം സെന്റ് ജോസഫ്സ്‌ പള്ളി പാരിഷ്‌ ട്രസ്റ്റി ജോസ്‌ ലൂക്ക്‌ വെള്ളിയംകുളത്തില്‍ എന്നിവര്‍ പ്രസംഗിച്ചു. ആല്‍ഫ മരിയ അക്കാദമി ഡയറക്ടർ ഫാ. അനീഷ്‌ പുളിച്ചമാക്കല്‍ സ്വാഗതവും പാരിഷ്‌ സെക്രട്ടറി ബേബി പഴംപ്ലാക്കല്‍ നന്ദിയും പറഞ്ഞു.
കെട്ടിട നിര്‍മാണം പൂര്‍ത്തിയാക്കിയ കരാറുകാരെയും അനുബന്ധ ജോലികള്‍ നിര്‍വഹിച്ചവരെയും ബിഷപ്‌ ഉപഹാരം നല്‍കി ആദരിച്ചു. രൂപത ചാന്‍സലര്‍ ഫാ. സെബാസ്റ്റ്യൻ കവളക്കാട്ട്‌, പ്രൊക്യുറേറ്റര്‍ ഫാ. കുര്യാക്കോസ്‌ മുഖാലയില്‍ തുടങ്ങിയവര്‍ നേതൃത്വം നല്‍കി.
