കാഞ്ഞിരപ്പള്ളി രൂപത ചെറുപുഷ്പ മിഷൻ ലീഗിന്റെ ആഭിമുഖ്യത്തിൽ ജനുവരി 26 വെള്ളിയാഴ്ച നടത്തപ്പെട്ട 27-ാമത് നിലയ്ക്കൽ തീർത്ഥാടനത്തിൽ ആയിരങ്ങൾ പങ്കു ചേർന്നു. മാർത്തോമാ ശ്ലീഹയുടെ വിശ്വാസ പ്രഘോഷണത്താൽ രൂപം പ്രാപിച്ച നിലക്കൽ സഭാ സമൂഹത്തിന്റെ ഓർമകളുണർത്തി ശ്ലീഹയുടെ പാദ സ്പർശനത്താൽ പുണ്യമായ വഴികളികളിലുടെ തീഷ്ണതയാൽ ജ്വലിക്കുന്ന ഹൃദയവുമായി മിഷൻലീഗ് അംഗങ്ങൾ അണി ചേർന്നു. നിലക്കൽ തുലാപ്പള്ളി മാർത്തോമാ ശ്ലീഹാ പള്ളിയിൽ രാവിലെ 10 മണിക്ക് കാഞ്ഞിരപ്പള്ളി രൂപത മെത്രാൻ മാർ ജോസ് പുളിക്കൽ തീർത്ഥാടന സന്ദേശം നൽകി. തുടർന്ന് രൂപതയിലെ നവവൈദികർ പരിശുദ്ധ കുർബാന അർപ്പിച്ചു. ഫാ.എബ്രഹാം വെള്ളാപ്പള്ളി മുഖ്യ കാർമികനായിരുന്നു. നവവൈദികർക്കുള്ള രൂപതാ മിഷൻ ലീഗിന്റെ ഉപഹാരം രൂപത ഭാരവാഹികൾ കൈമാറി.
തോമാശ്ലീഹായുടെ തിരുശേഷിപ്പ് വന്ദിച്ചതിനെ തുടർന്ന് ആങ്ങമൂഴിയിൽ നിന്ന് നിലയ്ക്കൽ എക്യുമെനിക്കൽ പള്ളിയിലേക്ക് പ്രദക്ഷിണമായി നീങ്ങിയ വിശ്വാസപ്രഘോഷണ റാലി തുലാപ്പള്ളി പള്ളി വികാരി ഫാ. സെബാസ്റ്റ്യൻ ഉള്ളാട്ട് ഫ്ലാഗ് ഓഫ് ചെയ്യ്തു. മിഷൻ ലീഗ് രൂപതാ പ്രസിഡണ്ട് മാത്യു മരങ്ങാട്ട് പതാക ഏറ്റുവാങ്ങി. എക്യുമെനിക്കൽ പള്ളിയിൽ നടത്തപ്പെട്ട സമാപന ശുശ്രൂഷകൾക്ക് അഡ്മിനിസ്ട്രേറ്റർ ഫാ.ബാബു മൈക്കിൾ 0.l.C നേതൃത്വം നൽകി. മിഷൻലീഗ് രൂപത ജോയിൻറ് ഡയറക്ടർ ഫാ. ആൻറണി തുണ്ടത്തിൽ കൃതജ്ഞത പ്രകാശനം നടത്തി.
കാഞ്ഞിരപ്പള്ളി രൂപതയിലെ എല്ലാ ഇടവകകളിലും നിന്നുള്ള മിഷൻ ലീഗ് അംഗങ്ങളായ ഏഴാം ക്ലാസ് വിദ്യാർത്ഥികളും ഭാരവാഹികളും പങ്കെടുത്ത തീർത്ഥാടനത്തിന് തുലാപ്പള്ളി ഇടവക അംഗങ്ങളും മിഷൻ ലീഗിന്റെ രൂപത, ഫൊറോനാ ഭാരവാഹികളും നേതൃത്വം നൽകി.
