ചെറുതോണി: ഉദരത്തിലുള്ള കുഞ്ഞിനും ആരോഗ്യവാനായ വ്യക്തിക്കും ഏതു നിമിഷവും മരണം സംഭവിക്കാവുന്ന അവസ്ഥയിലുള്ള രോഗിക്കും ദൈവിക ജീവൻ ഒരുപോലെയാണെന്ന് ഇടുക്കി രൂപതാധ്യക്ഷൻ മാർ ജോൺ നെല്ലിക്കുന്നേൽ. പാറത്തോട് സെന്റ് ജോർജ് പാരീഷ് ഹാളിൽ നടന്ന ഗുഡ് സമരിറ്റൻ പെയിൻ ആന്റ് പാലിയേറ്റീവ് ഇടുക്കി രൂപത രോഗീ ദിനാചരണത്തിൽ പങ്കെടുത്ത് സന്ദേശം നൽകുകയായിരുന്നു ബിഷപ്. വീട്ടിലുള്ളവരെ പരസ്പരം ശ്രദ്ധിക്കാൻ പോലും സമയമില്ലായെന്ന് പറയുന്നവരുടെ കാലമാണിത്. എല്ലാവരും മൊബൈൽ ഫോണിലെ കാഴ്ചകളിലെ കാഴ്ച്ചക്കാരായി മാറിയിരിക്കയാണ്. രോഗീശുശ്രൂഷയുടെ തലത്തെ വിശുദ്ധമായ പദവിയിൽ കാണാനും സമൂഹത്തിൽ അവതരിപ്പിക്കാൻ ശ്രമിച്ചതും ക്രിസ്തീയ സമുദായമാണ്. മനുഷ്യൻ നന്നായി ജീവിക്കുന്നതാണ് ദൈവത്തിന്റെ സുസ്തിരത. ദുർബലരെ സഹായിക്കലാണ് നമുക്ക് ചെയ്യാവുന്ന വലിയ പുണ്യ പ്രവർത്തി. ലൂർദ്ദ്മാതാവിന്റെ തിരുനാളിനോടനുബന്ധിച്ചാണ് ജോൺ പോൾ പാപ്പ രോഗീദിനം പ്രഖ്യാപിച്ചത്. ഇടുക്കി രൂപതയിൽ രോഗീ ദിനാചരണം രോഗികളെയും രോഗീ ശുശ്രൂഷകരെയും ആദരിക്കുന്നതാണ്. മനുഷ്യൻ ദുർബലനാകാൻ വളരെ ചെറിയ നിമിഷം മതിയാകും. ഇവിടെയാണ് പാലിയേറ്റീവ് പ്രവർത്തകരുടെ പ്രാധാന്യം വ്യക്തമാകുന്നത്. വിശ്വാസത്തിൽ കേൾക്കുന്ന കാര്യങ്ങൾ പരിശീലിക്കുന്നത് ഇത്തരം പ്രവർത്തനങ്ങളിലൂടെയാണ്. ക്രൈസ്തവ ജീവിതം പരിശീലിക്കാനുള്ളതാണ്. ഇടുക്കി രൂപതയിലെ പെയിൽ ആന്റ് പാലിയേറ്റീവ് പ്രവർത്തനം വളരെ ഭംഗിയായും ചിട്ടയായും നടക്കുന്നുണ്ട്. രോഗീ ശുശ്രൂഷകരെ പ്രത്യേകം പരിഗണിക്കണം. ആരോഗ്യരംഗത്ത് പ്രവർത്തിക്കുന്നവരോട് വലിയ ആദരവ് പുലർത്തണം. മനുഷ്യന് ഏകനായിരിക്കാനാവില്ല. മറ്റുള്ളവരോട് കരുണയും സഹാനുഭൂതിയും അലിവുമുള്ളവരായി മാറണമെന്നും മാർ ജോൺ നെല്ലിക്കുന്നേൽ ഓർമ്മിപ്പിച്ചു. ഗുഡ് സമരിറ്റൻ പെയിൻ ആന്റ് പാലിയേറ്റീവ് ഇടുക്കി രൂപത അസിസ്റ്റന്റ് ഡയറക്ടർ ഫാ.ജോൺസൺ ചെറുകുന്നേലിന്റെ കാർമ്മികത്വത്തിൽ വിശുദ്ധ കുർബാനയോടെ ദിനാചരണ പരിപാടികൾ ആരംഭിച്ചു. രോഗീകൾക്കായി പ്രത്യേക പ്രാർത്ഥനയും രോഗീ ശുശ്രൂഷകർക്ക് ക്ലാസും നടന്നു. മുരിക്കാശേരി അൽഫോൻസാ ആശുപത്രിയിലെ ഡോ.മാത്യു ജോസഫ്, ഡോ.സിസ്റ്റർ സുഗുണ എഫ് സി സി എന്നിവർ ക്ലാസുകൾ നയിച്ചു. രൂപത ഡയറക്ടർ റവ.ഡോ. സെബാസ്റ്റ്യൻ കൊച്ചുപുരക്കൽ ആമുഖ പ്രഭാഷണം നടത്തി. പാലിയേറ്റീവ് രൂപത സെക്രട്ടറി സിസ്റ്റർ റോസിൻ ജോസ് എഫ്സിസി റിപ്പോർട്ട് അവതരിപ്പിച്ചു. റോബർട്ട് കണ്ണഞ്ചിറ, ടോമി വെളിഞ്ഞാലിൽ, ജോസ് പൂതക്കുഴിയിൽ എന്നിവർ പ്രസംഗിച്ചു. രോഗിക കളയും രോഗീ ശുശ്രൂഷകരെയും ഉപഹാരങ്ങൾ നൽകി ബിഷപ്പ് ആദരിച്ചു. കുട്ടികളുടെ കലാപരിപാടികളും നടന്നു. രോഗികളുടെയും രോഗീ ശുശ്രൂഷകരുടെയും രൂപത സംഗമത്തിൽ അഞ്ഞൂറിലധികം പേർ പങ്കെടുത്തു. പാറത്തോട് സെന്റ് ജോർജ് ഇടവകയിലെ പാലിയേറ്റീവ് പ്രവർത്തകർ, കെ സി വൈ എം, മാതൃവേദി, മിഷൻ ലീഗ് സംഘടന പ്രവർത്തകർ പരിപാടികൾക്ക് നേതൃത്വം നൽകി.
രോഗീ ദിനാചരണത്തിന്റെ ഭാഗമായി ഹൈറേഞ്ച് ഡവലപ്പ്മെന്റ് സൊസൈറ്റിയുടെ നേതൃത്വത്തിൽ നിർദന രോഗികൾക്ക് നൽകുന്ന വീൽചെയറിന്റെ വിതരണോദ്ഘാടനം മാർ ജോൺ നെല്ലിക്കുന്നേൽ നിർവ്വഹിക്കുന്നു.
