പാലാ: പാലാ രൂപതയുടെ പ്ലാറ്റിനം ജൂബിലിക്ക് ഒരുക്കമായി കുടുംബങ്ങളുടെ നവീകരണത്തിനായി ഇൻ്റെൻസീവ് ഹോം മിഷൻ പദ്ധതി നടപ്പിലാക്കുന്നു. ഇതിനായി രൂപതയിലെ വിവിധ സന്യാസിനി സമൂഹങ്ങളിൽ നിന്നുള്ള 306 ബഹുമാനപ്പെട്ട സിസ്റ്റേഴ്സ് 2 ബാച്ചുകളിലായി പരിശീലനം പൂർത്തിയാക്കി. കുടുംബപ്രേഷിതത്വം മുഖ്യ ഉത്തരവാദിത്വമായി സ്വീകരിച്ചിരിക്കുന്ന ഹോളി ഫാമിലി സന്യാസിനി സമൂഹത്തിന്റെ നേതൃത്വത്തിലാണ് പരിശീലനപദ്ധതി നടപ്പിലാക്കിയത്. ഏപ്രിൽ മാസം 1-ാം തീയതി ആരംഭിച്ച പരിശീലനപദ്ധതി പാലാ രൂപതാദ്ധ്യക്ഷൻ മാർ ജോസഫ് കല്ലറങ്ങാട്ട് ഉദ്ഘാടനം ചെയ്തു. കാനായിലെ കുടുംബത്തിലേയ്ക്കുള്ള മറിയത്തിന്റെ യാത്ര സന്യസ്തർ മാതൃകയാക്കണമെന്ന് അദ്ദേഹം ഓർമ്മിപ്പിച്ചു. രൂപതയിലെ 70000 കുടുംബങ്ങളിലേയ്ക്ക് ഏപ്രിൽ, മെയ്, ജൂൺ മാസങ്ങളിലായി പരിശീലനം പൂർത്തിയാക്കിയ സിസ്റ്റേഴ്സും ഹോളി ഫാമിലി സന്യാസിനി സമൂഹത്തിലെ സിസ്റ്റേഴ്സും ഇടവകകൾ കേന്ദ്രീകരിച്ച് എത്തിചേരും. ഇന്റെൻസീവ് ഹോംമിഷൻ്റെ പൊതുച്ചുമതല വഹിക്കുന്ന പാലാ രൂപത പ്രോട്ടോ സിഞ്ചെല്ലൂസ് വെരി റവ. ഫാ. ജോസഫ് തടത്തിലും, പാലാ രൂപത ഫാമിലി അപ്പോസ്തലേറ്റ് ഡയറക്ടർ ഫാ. ജോസഫ് നരിതൂക്കിലും പരിപാടികൾക്ക് നേതൃത്വം നൽകി.
