കോതമംഗലം രൂപതയിൽ നാലും അതിൽ കൂടുതലും കുഞ്ഞുങ്ങളുള്ള കുടുംബങ്ങളുടെ സമ്മേളനം ഏപ്രിൽ 11ന് നടന്നു. രൂപതാ സോഷ്യൽ സർവീസ് ഡിപ്പാർട്ട്മെന്റ്,പ്രൊ ലൈഫ്, ഫാമിലി അപ്പോസ്തലറ്റ് എന്നിവയുടെ സംയുക്താഭിമുഖ്യത്തിൽ നടന്ന സമ്മേളനത്തിൽ രൂപതയിലെ വിവിധ ഇടവകകളിൽപ്പെട്ട 254 കുടുംബങ്ങളിൽ നിന്നായി മാതാപിതാക്കളും കുഞ്ഞുങ്ങളും ഉൾപ്പെടെ ആയിരത്തിലധികം പേർ വാഴക്കുളം വിശ്വജ്യോതി എൻജിനീയറിങ് കോളേജിൽ വച്ച് നടന്ന സമ്മേളനത്തിൽ പങ്കെടുത്തു. കൂടുതൽ കുഞ്ഞുങ്ങൾ ഉള്ള കുടുംബങ്ങൾ ദൈവപരിപാലന കൂടുതൽ ആസ്വദിക്കുന്നവരാണെന്നും ദൈവത്തിന്റെ കരുണയും സ്നേഹവും കൂടുതലായി ഇവരിലേക്ക് വർഷിക്കപ്പെടുമെന്നും രൂപത വലിയ കുടുംബങ്ങളോടൊപ്പം എന്നും ഉണ്ടാകുമെന്നും ഉദ്ഘാടന സന്ദേശത്തിൽ കോതമംഗലം രൂപതാധ്യക്ഷൻ മാർ ജോർജ് മഠത്തിക്കണ്ടത്തിൽ പറഞ്ഞു. ഫാ. ജോർജ് ചേറ്റൂർ നയിച്ച പ്രാർത്ഥനാ ശുശ്രൂഷയോടെ ആരംഭിച്ച സമ്മേളനത്തിൽ ഡോ. ഫിന്റോ ഫ്രാൻസിസ് ക്ലാസ്സ്‌ നയിച്ചു. വിശ്വജ്യോതി എൻജിനീയറിങ് കോളേജ് ഡയറക്ടർ ഫാ. പോൾ പാറത്താഴം സന്ദേശം നൽകി. പങ്കെടുത്ത എല്ലാ കുടുംബങ്ങൾക്കും രൂപതയുടെ സ്നേഹോപഹാരം കൈമാറി. രൂപത സോഷ്യൽ സർവീസ് ഡയറക്ടർ ഫാ. ജോർജ് പൊട്ടയ്ക്കൽ ഫാമിലി അപ്പോസ്തലേറ്റ് ഡയറക്ടർ ഫാ. ജോസ് കിഴക്കേൽ എന്നിവർ സംസാരിച്ചു.