തൃശൂർ : രാജ്യത്തെ സമകാലിക രാഷ്ട്രീയ സാമൂഹ്യ പശ്ചാത്തലത്തിൽ മതസഹിഷ്ണുതയും, പരസ്പര ബഹുമാനവുമുള്ള ഒരു തലമുറയെ വാർത്തെടുക്കുന്നതിൽ അധ്യാപകർക്ക് വലിയ പങ്ക് വഹിക്കാനുണ്ടെന്ന് ആർച്ച് ബിഷപ്പ് മാർ ആൻഡ്രൂസ് താഴത്ത് അഭിപ്രായപ്പെട്ടു. അതിരൂപത കാത്തലിക് ടീച്ചേഴ്സ് ഗിൽഡിന്റെ സുവർണ്ണ ജൂബിലി ആഘോഷങ്ങളുടെ സമാപന സമ്മേളനം ഉൽഘാടനം ചെയ്യുകയായിരുന്നു അദ്ദേഹം. ഗിൽഡ് അതിരൂപത പ്രസിഡന്റ് എ.ഡി സാജു മാസ്റ്റർ അദ്ധ്യക്ഷത വഹിച്ചു. ഈ വർഷം സർവീസിൽ നിന്ന് വിരമിക്കുന്ന 117 അധ്യാപകർക്ക് സഹായമെത്രാൻ മാർ ടോണി നീലങ്കാവിൽ മൊമെന്റോ വിതരണം ചെയ്തു. ഗിൽഡ് ബെസ്റ്റ് യൂണിറ്റ് അവാർഡിന് കണ്ടശ്ശാങ്കടവ് സേക്രഡ് ഹാർട്ട് ഓഫ് മേരീസ് കോൺവെന്റ് ഹൈസ്കൂളും, ബെസ്റ്റ് ഗിൽഡ് ടീച്ചർ ആയി വടക്കാഞ്ചേരി സെന്റ് പയസ് കോൺവെന്റ് സ്കൂളിലെ മോളിപീറ്റർ ടീച്ചറും അർഹത നേടി. മുൻ കാല ഡയറക്ടർമാരെ ആർച്ച് ബിഷപ്പ് ആദരിച്ചു. യോഗത്തിൽ ഡയറക്ടർ ഫാ.ജോയ് അടമ്പുകുളം അധ്യാപക അവാർഡുകൾ പ്രഖ്യാപിച്ചു. വികാരി ജനറാൾ മോൺ.ജോസ് കോനിക്കര, ഫാ.ലോറൻസ് ഒലക്കേങ്കിൽ, ഫാ.തോമസ് വടക്കേത്തല, ഫാ.തോമസ് കാക്കശ്ശേരി, വിവിധ കോർപ്പറേറ്റ് മാനേജർമാരായ സിസ്റ്റർ റാണി കുരിയൻ, സിസ്റ്റർ സ്റ്റെല്ല റോസ്, സിസ്റ്റർ ശാന്തി എന്നിവർ പ്രസംഗിച്ചു.ജനറൽ സെക്രട്ടറി ജോഫി.സി മഞ്ഞളി സ്വാഗതവും ജനറൽ കൺവീനർ ജോഷി വടക്കൻ നന്ദിയും പറഞ്ഞു.ബിജു.പി.ആൻ്റണി, പി.ഡി ആന്റോ, എൻ.പി ജാക്സൻ, ബെസി ടീച്ചർ എന്നിവർ നേതൃത്വം നൽകി.
തൃശ്ശൂർ അതിരൂപത കാത്തലിക് ടീച്ചേഴ്സ് ഗിൽഡ് സുവർണ്ണ ജൂബിലി സമാപന സമ്മേളനം ആർച്ച് ബിഷപ്പ് മാർ ആൻഡ്രൂസ് താഴത്ത് ഉദ്ഘാടനം ചെയ്യുന്നു.
